Gallsúr stemning í klefa Man. Utd

Lið United hefur nú tapað tíu leikjum samtals, eftir 1-0 tapið gegn Newcastle á laugardagskvöld. Liðið tekur á móti Chelsea annað kvöld og fram undan eru leikir við Bournemouth, Bayern München og Liverpool. ESPN segir áhyggjur af því innan United að stemningin í klefanum súrni enn frekar fari þessir leikir illa.

Sky Sports segir ljóst að hópur leikmanna United sé óánægður og einn heimildarmanna segir Ten Hag hafa misst 50% búningsklefans. Það sé vegna þess að hann hafi ekki brugðist við áhyggjuröddum leikmanna, og útlegð Sancho spilar einnig inn í.

„Við skulum hafa á hreinu að það er mjög auðvelt að sparka í félag þegar illa gengur. Það er auðvelt að sparka í Erik ten Hag þegar hann liggur. Það er mjög auðvelt að segja að hann sé búinn að missa klefann og að leikmenn séu ekki að spila fyrir hann,“ sagði Kaveh Solhekol, fréttastjóri hjá Sky Sports.

Ósáttir við leikskipulag, æfingar og meðferðina á Sancho

„Samkvæmt mínum upplýsingum eru sumir leikmenn ringlaðir yfir því sem er í gangi. Hann hefur misst hluta af klefanum. Einn segir mér að hann hafi misst um 50 prósent klefans.

Fjöldi leikmanna er ósáttur við leikskipulag liðsins. Þeim finnst þeir líka þurfa að æfa of stíft og hlaupi of mikið á æfingum. Mér skilst að leikmennirnir viti ekki til hvers þessi hlaup sé,“ sagði Solhekol og bætti við að leikmenn hefðu reynt að ræða við Ten Hag og deila reynslu sinni frá því að spila fyrir önnur stórlið, og að þeim þætti að hann mætti bregðast betur við því.

„Ég hef líka heyrt að leikmenn telji að hann sé of ákveðinn í að gera hlutina eftir sínu höfði og að hann sé of vélrænn,“ sagði Solhekol.

Sancho hefur ekki spilað fyrir United síðan í ágúst eftir að hann skrifaði á samfélagsmiðlum að hann hefði verið gerður að blóraböggli í langan tíma hjá félaginu. Solhekol segir þetta valda óánægju hjá nokkrum leikmönnum en Sancho hafi neitað að biðja Ten Hag afsökunar.

„Hann æfir með krökkum og þarf að borða einn. Hópi leikmanna finnst þetta of langt gengið. Það eru alltaf einhverjir óánægðir í klefanum en þegar leikirnir tapast þá fjölgar þeim,“ sagði Solhekol.