Megas endurútgefinn og nýr

Í dag, 16. nóvember, á degi íslenskrar tungu, koma þrjár af plötum Megasar út á nýjan leik. Þetta er í annað sinn sem Íslenskir tónar senda frá sér veglegar endurútgáfur á plötum Megasar en árið 2002 komu 10 fyrstu sólóplötur meistarans út ásamt miklu aukaefni við mikinn fögnuð aðdáenda. Sami háttur er hafður á nú og haldið er áfram þaðan sem frá var horfið því plöturnar þrjár eru þær sömu og komu út í kjölfar þeirra 10 fyrstu á sínum tíma. Þetta eru plöturnar Hættuleg hljómsveit og glæpakvendið Stella (1990), Þrír blóðdropar (1992) og Drög að upprisu (1994).

Á nýju útgáfunni af Hættulegri hljómsveit og glæpakvendinu Stellu má finna heila aukaplötu sem Megas kallar "Óspillt Stella, ung og stök". Sú geymir frumupptökur nánast allra laga plötunnar.

Hin nýja útgáfa Þriggja blóðdropa skartar einnig fjölda aukalaga.

Ný útgáfa plötunnar Drög að upprisu inniheldur einnig aukaplötu með 10 lögum sem ekki komu út á upphaflegu plötunni en á Drögum að upprisu léku Nýdönsk undir hjá Megasi á tónleikum í Menntaskólanum við Hamrahlíð.

Til viðbótar við þessar þrjár endurútgáfur kemur einnig út tvöfalda hljómleikaplatan "Greinilegur púls" en hún var hljóðrituð á tónleikum Megasar með kjarna Sykurmolanna á hljómleikum á Púlsinum árið 1991. Þessi frábæra hljómleikaupptaka hefur aldrei verið gefin út áður.