Moss-æðið magnast

Stærstu tískufréttir vikunnar voru án efa þegar fatalína fyrirsætunnar Kate Moss varð loks fáanleg í fatakeðjunni Top Shop í London. Hinn 1. maí beið fjöldi manns í ofvæni fyrir utan höfuðstöðvar Top Shop í Oxford Street þar til klukkan átta um kvöldið þegar talið var niður: „Fimm, fjórir, þrír, tveir, einn!“ og risagardína opnaðist til að sýna fröken Moss í glugganum, líkt og búðargína, í eldrauðum síðkjól í anda fjórða áratugarins. Kate Moss fór svo ásamt milljarðamæringnum og eiganda Top Shop, Philip Green, í kokkteil þar sem bar að líta enskar stjörnur eins og Lily Cole, Sadie Frost og Peaches Geldof. Viðskiptavinir sem biðu í löngum röðum fyrir utan verslunina fengu að koma inn í hollum þar til á miðnætti. Sjálf Top Shop-verslunin hafði fengið andlitslyftingu ásamt fjólubláum sófum, fuglabúrum, kertastjökum og hlébarðamynstri og meira að segja innkaupapokarnir voru merktir Kate Moss. Flíkurnar seldust upp næstum samstundis en þær vinsælustu virtust vera blómakjóll í 40‘s stíl, sítrónugulur kokkteilkjóll og gegnsæ blússa með stöfunum K.M áletruðum í mynstrinu. Í næstu viku verður Kate Moss- línan opnuð í Barney‘s í New York, en hérlendis með pomp og pragt 24. maí. - amb