Fljótlegur lúxusréttur

Kvennakórinn Léttsveit Reykjavíkur gaf nýlega út aðra uppskriftabók sína, sem er stútfull af leynivopnum úr eldhús­skúffum kórkvenna. Anna Sigurjónsdóttir ljóstrar upp uppskrift að lúxusfiskrétti.

Anna hefur verið meðlimur í kórnum í ein sjö ár og líkar starfið afskaplega vel. „Það er alltaf nóg að gerast og þetta er afskaplega skemmtilegur hópur,“ sagði Anna, en í kórnum eru um 120 konur.

„Við gáfum út uppskriftabók fyrir um tveimur árum síðan og svo plötu í tilefni tíu ára afmælis kórsins í fyrra. Svo förum við til útlanda að syngja annað hvert ár, og hitt árið ferðumst við innanlands. Við vorum til dæmis á Austfjörðum núna í ár,“ sagði Anna. Þar að auki er farið í gönguferðir, útilegur og „makalaus“ hópur kórkvenna hittist reglulega, að sögn Önnu. „Þetta er nánast þannig að vinnan trufli mann í þessu,“ bætti Anna hlæjandi við.

Í matreiðslubókinni er að finna uppskriftir frá hverjum kórfélaga og stjórnendum. „Það var skylda að þetta væri uppskrift sem við notum reglulega og erum ánægðar með,“ útskýrði Anna, en lúxusfiskrétturinn er í uppáhaldi á hennar heimili. „Það er mikið vegna þess að hann er mjög fljótlegur, þrátt fyrir að uppskriftin líti kannski út fyrir að vera flókin,“ sagði hún.

Rétturinn ber líka nafn með rentu að sögn Önnu. „Þetta er svolítill lúxus, svona spari – þegar maður bregður út af venjulega steikta fiskinum eða soðningunni,“ sagði hún og hló við.

Bókina er aðeins hægt að kaupa hjá kórkonum. Nánari upplýsingar er að finna á síðunni www.lettsveit.is.