Zach Johnson sigraði óvænt

Zach Johnson, 31 árs Bandaríkjamaður, bar sigur úr býtum á Mastersmótinu í golfi sem lauk í Georgíu í Bandaríkjunum í gær. Johnson lauk keppni á samtals einu höggi yfir pari en næstu menn, Tiger Woods, Rory Sabbatini og Retief Goosen, léku samtals á þremur höggum yfir pari. Þetta er fyrsti sigur Johnson á stórmóti.

Johnson skaust upp í sviðsljósið á lokahringnum í gær en lítið hafði farið fyrir honum á fyrstu þremur keppnisdögunum, þrátt fyrir að hann hafi aldrei verið langt á eftir næstu mönnum. Í gær lék hann á samtals þremur höggum undir pari og var það sérstaklega góður endasprettur sem tryggði honum á endanum sigurinn.

Tiger Woods tók nokkra áhættu í leik sínum á lokasprettinum í gær, vitandi að það væri eini möguleiki hans til að ná Johnson, sem hafði lokið keppni nokkrum holum á undan Woods. Sá leikur gekk ekki upp og því náði Woods ekki að ógna Johnson að neinu viti.

"Eins og þeir segja, risar þurfa að falla einhverntímann," sagði Johnson eftir mótið, og átti þar við sigur sinn á Tiger Woods. "Ég var í búningsklefanum mínum og horfði á Tiger undirbúa upphafshöggið á 18. braut. Ég hafði tveggja högga forskot en samt hafði ég trú á því að hann myndi ná mér. Tiger er náttúrulega fyrirbæri og undarlegri hlutir hafa gerst en að hann nái erni á lokaholunni," sagði Johnson. Tiger brást hins vegar bogalistin og náði aðeins pari á lokaholunni.