Besti árangur Birgis Leifs á ferlinum

Birgir Leifur Hafþórsson, atvinnukylfingur úr GKG, lék lokahringinn á Opna ítalska mótinu í Mílanó í dag á 69 höggum, eða 3 höggum undir pari. Hann lék hringina þrjá á samtals 13 höggum undir pari og er í 11. sæti og er ljóst að þetta er besti árangur hans á ferlinum og um leið besti árangur Íslendings á alþjóðlegu golfmóti. Hann fékk skolla á lokaholunni, sem kostaði hann nokkur þúsund evrur.

Verðlaunin sem hann fær í þessu móti eru um 30 þúsund evrur eða um 2,5 milljónir króna. Hann hefur aldrei áður fengið svo mikla peninga í verðlaunafé. Hann ætti með þessum árangri í dag að hækka sig verulega á evrópska peningalistanum, en hann var í 215. sæti fyrir mótið á Ítalíu. Reikna má með að hann verði í kringum 160. sæti eftir daginn í dag.

Birgir Leifur fékk fugl á 1., 5., 9., 10. og 14. holu og skolla á 8. holu og 18. holu. Hann lék fyrstu tvo hringina á 67 höggum og lék því stöðugt og gott golf í þessu móti. Þessi árangur ætti að gefa honum meira sjálfstraust í næstu verkefnum. Hann sýndi og sannaði að hann getur blandað sér í toppbaráttuna í þessum mótum.

Besti árangur hans á Evrópumótaröðinni fyrir þetta mót var 25. sæti á TCL Classic mótinu í Kína í mars. Fyrir mótið í Mílanó hafði hann unnið sér inn samtals 1,2 milljónir króna á 6 mótum þannig að með árangrinum í dag er hann kominn með 3,7 milljónir í verðlaunafé í sjö mótum.

Frétt af Kylfingur.is

Skorkort Birgis á Ítalíu