Anders Hansen sigraði á BMW mótinu

Englendingurinn Justin Rose og Daninn Anders Hansen urðu efstir og jafnir á BMW PGA meistaramótinu sem fram fór um helgina á Wentworth-vellinum í Surrey á Englandi. Þeir Rose og Hansen léku hringina fjóra á 8 höggum undir pari, einu höggi færra en Vijay Singh og Richard Sterne sem deildu 3.-4. sæti.

Bráðabana þurfti því millum þeirra Rose og Hansen til að fá úr skorið með sigurvegara. Þeir félagar léku því 18. holuna öðru sinni en holan sú er 492 metra löng par-5 hola.

Teighögg Rose fór í karga hægra megin við braut en Hansen átti gott upphafshögg sem lenti á miðri braut. Annað högg þeirra beggja lenti á mjög svipuðum stað, um 90 metra frá holu. Rose sló þvínæst sitt þriðja högg og var það ögn betra en Hansens.

Hansen átti um 15 feta pútt eftir fyrir fugli en Rose um 12 feta pútt. Hansen gerir sér lítið fyrir og setur púttið ofan í fyrir fugli og því pressan komin á Rose. Hann missir sitt pútt og því danskur sigur í annað sinn á fimm árum á BMW PGA meistaramótinu.

Paul Broadhurst og Ross Fisher voru í forystu fyrir lokahringinn en léku skelfilega í dag, Broadhurst á 80 höggum og Fisher á 84. Broadhurst féll við það niður í 20.-23. sæti en Fisher niður í 39.-40. sæti.

Frétt af Kylfingur.is