40 hafa náð draumahögginu í ár

4. júlí 2007 13:36

Það sem af er golfvertíð 2007 eru komnar 40 tilkynningar til skrifstofu GSÍ um holu í höggi. Einhverjir fleiri en þeir sem eru á listanum hér fyrir neðan hafa eflaust náð draumahögginu í ár en ekki tilkynnt það á réttu eyðublaði og sent til GSÍ. Á meðan að svo er ekki er afrekið ekki viðurkennt af Einherjaklúbbnum og því ekki skráð.

Af síðustu 14 tilkynningum um holu í höggi til GSÍ koma sex þeirra frá Urriðavelli. Júlíus Júlíusson úr GR var að fara holu í höggi í fjórða sinn. Alexander Högnason, fyrrum knattspyrnukappi frá Akranesi, fór holu í höggi í fyrsta sinn á sínum heimavelli. Þá kom ein tilkynning um holu í höggi frá hinum fræga golfvelli í Svíþjóð, Albatros Golf Club, en það gerði Halldór Ingvason úr GR. Við óskum öllum þeim sem farið hafa holu í höggi í ár til hamingju með draumahögg allra kylfinga.

Allar reglur um hvað gera skal þegar einhver fer holu í höggi má finna á síðu Einherja á golf.is og þar má einnig nálgast skjalið sem þarf að fylla út og senda til GSÍ. Það er einnig til undir Skjöl í gögnum GSÍ á golf.is. Flest allir golfklúbbar á landinu eru einnig með þessi eyðublöð í sínum fórum og má því fylla þau út á staðnum.

Smelltu hér til að sjá lista yfir þá sem hafa náð draumahögginu í ár.

Frétt af kylfingur.is

Golf