Inter ekki á eftir Mourinho

Massimo Moratti, forseti Inter Milan, hefur þverneitað þeim sögusögnum að félagið hafi rætt við Jose Mourinho um að taka að sér starf knattspyrnustjóra.

Frétt þess efnis birtist í Gazetta dello Sport í morgun og sagði Moratti í yfirlýsingu í morgun að fréttin væri alröng.

„Moratti hefur staðfastlega neitað því að hafa haft samband við Mourinho né heldur hitt hann að máli," sagði í yfirlýsingunni. „Þetta er rangt og slíkar fréttir hafa slæm áhrif á félagið."

Mourinho hefur einnig verið orðaður sterklega sem eftirmaður Carlo Ancelotti hjá AC Milan.