Mickelson vann loksins í LA

Phil Mickelson bar sigur úr býtum á opna Northern Trust-mótinu í gær eftir að Jeff Quinney afhenti honum sigurinn á silfurfati á síðari níu holunum.

Mótið hét áður opna Los Angeles-mótið en fyrir 20 árum spilaði Mickelson á Riviera-vellinum, þá sem sautján ára áhugamaður. Honum tókst í gær að vinna sér sess meðal sigurvegara í þessu sögufræga móti.

Hann og Quinney voru í hörðum slag framan af og komst sá síðarnefndi í forystuna um miðjan hring. Þá fór hins vegar allt úrskeðis hjá Quinney, sérstaklega í púttunum. Hann fékk fjóra skolla á fimm holum á síðari níu í gær, frá þrettándu til sautjándu.

Mickelson kláraði hins vegar tvö mikilvæg pútt á síðari níu sem gerði það að verkum að hann gat verið rólegur á þeirri átjándu þar sem hann var með þriggja högga forystu.

Mickelson lék á 70 höggum í gær og samtals á tólf höggum undir pari en Quinney á 71 höggi og tíu undir pari. Patraig Harrington og Luke Donald komu næstir á sjö undir pari en Luke Donald fékk skolla á átjándu og lauk keppni á sex undir pari ásamt Japananum Ryuji Imada.

Mickelson komst nálægt því að vinna þetta mót í fyrra en skolli á átjándu gerði það að verkum að hann þurfti að fara í umspil gegn Charles Howell sem sá síðarnefndi vann.

Hann kemst kannski aldrei með tærnar þar sem Tiger Woods hefur hælana en það verður þó ekki af Mickelson tekið að Tiger hefur aldrei fagnað sigri á Riviera-vellinum.