Beckham-sagan ekki öll

Forráðamenn AC Milan neita að játa sig sigraða í slagnum um David Beckham sem er í láni hjá félaginu frá LA Galaxy í Bandaríkjunum.

Forráðamenn Galaxy sögðu að ekkert yrði að því að Beckham yrði seldur til Milan. Þeir vildu ganga frá því máli á föstudaginn í síðasta lagi en það tókst ekki.

Adriano Galliani, framkvæmdarstjóri AC Milan, sagði þetta lítið annað en herbragð af hálfu Galaxy.

„Það er tími til að ganga frá þessu alveg til níunda mars," sagði Galliani en þá rennur lánssamningurinn út. „Sem þýðir að við höfum enn 20 daga til að ganga frá þessu."

AC Milan og Inter mætast í borgarslag Mílanó í kvöld og sagðist Galliano vonast til þess að hann spili í fleiri slíkum leikjum í framtíðinni.