Íslendingaliðið Brann búið að reka þjálfarann

Steinar Nielsen var í morgun rekinn frá Íslendingaliðinu Brann en gengi liðsins hefur engan veginn staðist væntingar á tímabilinu. Brann er sem stendur í 13. sæti norsku úrvalsdeildarinnar með 10 stig eftir tólf leiki. Liðið tapaði gegn 3. deildarliðinu Fylligen í bikarnum fyrr í vikunni og ljóst að það hefur fyllt mælinn hjá stjórnarformönnum félagsins þar sem Nielsen var látinn taka pokann sinn í morgun. Þeir félagar Ólafur Örn Bjarnason, Gylfi Einarsson og Birkir Már Sævarsson leika allir í liði Brann.