Tveir erlendir kastsnillingar með námskeið

Daninn Klaus Frimor og Englendingurinn Mark Surtees verða með kastnámskeið í sumar.

Námskeiðin hjá Klaus Frimor hefjast næstu mánaðamót

Klaus Frimor, sem er hér á vegum veiðiverslunarinnar Veiðiflugna, verður með námskeið um næstu mánaðamót. Fyrsta námskeiðið hefst 29. maí og síðan verður hann með námskeið á hverju kvöldi til 13. júní. Námskeiðin standa frá klukkan 18 til 22 og eru haldin við Rauðavatn. Samkvæmt tilkynningu frá Veiðiflugum henta námskeiðin bæði byrjendum sem og þeim sem eru lengra komnir og vilja slípa til köstin hjá sér. Kennd verða yfirhandarköst og undirhandarköst með einhendu og tvíhendu.

„Klaus mun fara yfir bæði stangir og línur fyrir námskeiðin í verslun Veiðiflugna á Langholtsvegi 111 og ráðleggja með rétt val á línum svo allir fái sem mest út úr námskeiðinu," segir í tilkynningu Veiðiflugna.

Námskeiðið kostar 10 þúsund krónur og innifalið í því verði er kennsludiskur svo veiðimenn geti rifjað upp kasttæknina eftir að námskeiðinu lýkur. Áhugasömum er bent á að hafa samband við verslun Veiðiflugna eða senda Hilmari Hanssyni tölvupóst, hilmar@veidiflugur.is.

Námskeiðið hjá Mart Surtees verður í byrjun júlí

Englendingurinn Mark Surtees , sem verður hér á vegum Hilmars Þ. Jónssonar kastkennara, mun halda kastnámskeið dagana 1. og 2. júlí.

Samkvæmt fréttatilkynningu hefur Surtees stundað fluguveiði í tæpa hálfa öld og er hann útlærður kastkennari. Hann byrjaði að veiða á flugu árið 1966, þá átta ára gamall, og hefur ekki hætt. Hann hefur meðal annars unnið sem leiðsögumaður í Patagóníu í Chile og í kennslu sinni leggur hann áherslu á einfalda og skilvirka kennslutækni.

„Mark er skráður sem kastkennari hjá British Fly Casting Club og er UK Angling Development Board Level 2 leiðbeinandi," segir í tilkynningu.

Þeir sem eru áhugasamir geta sent Hilmari tölvupóst á netfangið Himmi@mail.com fyrir næstkomandi mánudag.