Rannsakar tímann - og það þarf meira en stofudrama til

Stundarbrot er nýtt íslenskt verk eftir Leif Þór Þorvaldsson og verður frumsýnt á Nýja sviðinu í Borgarleikhúsinu næstkomandi fimmtudag. Um er að ræða nokkurskonar samspil vísinda, leikhúss og dans.

Leifur, sem útskrifaðist úr Fræði og framkvæmd í Listaháskóla Íslands árið 2009, fór af stað með krafti, en útskriftarverkefni hans, Endurómun var tilnefnt til Grímunnar sama ár. Þá fékkst hann einnig við blandað leikhús þar sem dans og leikur komu við sögu.

Áhorfendur mega því búast við framsæknu sviðslistaverki sem notar viðfangsefnið til þess að skapa ógleymanlega sjóræna upplifum fyrir áhorfendur.

„Í Stundarbroti er fjallað um tímann - hann er teygður, beygður og afmyndaður með aðferðum leikhússins þar til skynjunin er sprengd í loft upp og skilin eftir í tætlum," segir leikstjórinn Leifur Þór sem semur og leikstýrir verkinu.

Lydia Grétarsdóttir semur tónlistina en dansarar í verkinu eru þær Ásrún Magnúsdóttir, Kara Hergils Valdimarsdóttir, Védís Kjartansdóttir og Þyrí Huld Árnadóttir.

Viðfangsefni Stundarbrots er tíminn og er sýningin sprottin af þverfaglegri rannsóknarvinnu aðstandenda sýningarinnar á þessu flókna viðfangsefni. Í verkinu er tekist á við lúmska spurningu: Hvað er tíminn?

„Vangaveltur um tímann geta reynst okkur flestum yfirþyrmandi umhugsunarefni því tíminn setur tilveru okkar í samhengi við eitthvað miklu stærra en við náum utan um," segir Leifur og bætir við að lokum: „Það þarf eitthvað annað en stofudrama til að fást við þetta heillandi hugtak."

Eins og fyrr segir þá er leikritið frumsýnt annað kvöld í Borgarleikhúsinu.