Land Rover Defender lúxuskerra

Land Rover Defender er einn hráasti bíll að innan sem kaupa má og eru sumir traktorar með íburðarmeiri innréttingar en hann. Það þýðir ekki að honum megi breyta. Carisma Auto Design sá spaugilegu hliðina á þessu öllu saman og breytti þessum Defender í sannkallaða draumaveröld farþegans.

Það er ekki ónýtt að geta farið á þessum bíl um óbyggðirnar í svo miklum lúxus að vart má finna hliðstæðu í Bugatti eða Jaguar bílum. Drekka má ískalt kampavínið uppúr kælunum sem finna má í bílnum og sæta lagi á milli hola til að væta kverkarnar.

Einnig má horfa á góða bíómynd á leið upp fjöllin eða þvælast á netinu sitjandi í hvítu stöguðu leðrinu sem prýðir sætin. Ekki fylgir sögunni hversu mikið svona yfirhalning á Defender kostar, en það getur ekki verið ódýrt. Bíllinn er hinsvegar algerlega óbreyttur að utan.