Bílar

Honda NSX með 3 rafmótora og 2 forþjöppur

Finnur Thorlacius skrifar
Nýr Honda NSX.
Nýr Honda NSX.
Ein venjuleg brunavél fer að verða sjaldséð í bílum og rafmótorar spila æ meira hlutverk í nýrri gerðum þeirra. Þó slá þeir fæstir við næstu gerð Honda NSX sem vopnaður verður einum þremur rafmótorum og að auki tveimur forþjöppum. Samt verður í bílnum 3,5 lítra V6 vél, svo eitthvað ætti hann að komast áfram.

NSX-bíllinn verður fjórhjóladrifinn og ný gerð hans kemur árið 2015 eftir 10 ára framleiðsluhlé. Hann verður með tveggja kúplinga skiptingu, en fjöldi gíra er ekki ljós, en líklegt er að hún verði 7 eða 8 þrepa. Nánari upplýsinga er að vænta af þessum bíl á blaðamannadögum Tokyo bílasýningarinnar, sem nú er hafin.

Honda framleiddi NSX bílinn frá 1990 til 2005, en hætti þá framleiðslu hans við litla hrifningu bílaáhugmanna þar sem hann hefur þótt afar skemmtilegur sportbíll. Nú getur fólk aftur farið að láta sig dreyma. Síðustu árgerðirnar af NSX voru skráð fyrir 290 hestöflum, en margir vildu reyndar meina að bíllinn væri mun öflugri, en Honda vildi ekki gefa upp hærri tölu til að hlýta reglugerðum.

Mest lesið




×

Mest lesið