Flokkunarmóttaka að tæknivæðast

Einnota drykkjarumbúðir sem innihalda ekki mjólk eru samkvæmt lögum í skilakerfi og fæst endurgreiðsla við skil þeirra að upphæð 14 kr. Víða á stöðvum Endurvinnslunnar er hægt að leggja andvirði söfnunar beint inn á ýmis góðgerðarmál. Eins og margir viðskiptavinir hafa tekið eftir er í auknum mæli verið að vélvæða móttöku þessara umbúða og þurfa viðskiptavinir því ekki lengur að flokka og telja heilar umbúðir sem skilað er á tæknivæddar stöðvar. Árlega drekka Íslendingar úr um 115 milljónum drykkjarumbúða og skila til baka um 100 milljónum umbúða sem er mjög góður árangur á alþjóðlegan mælikvarða. Þetta eru umbúðir sem á hverju ári skapa um 250 milljónir í útflutningsverðmæti í stað þess að lenda á sorphaugum landsmanna. Ef öllum flöskum sem Endurvinnslan hefur safnað frá árinu 1989 yrði raðað saman myndi sú röð ná til tunglsins. Við endurvinnslu einnar áldósar þarf einungis 5% af þeirri orku sem færi í frumvinnslu á áli. Plast í drykkjarflöskum er oftast úr PET-efni sem er endurunnið áfram í plastbakka, flíspeysur o.fl. Kostnaðarsamt er að taka við gleri og því hefur Endurvinnslan ekki tekið við öðru gleri en því sem tilheyrir skilakerfi drykkjarumbúða. Nánari upplýsingar er að finna á Endurvinnslan.is.