Stefnir í B-deildarbolta hjá Skúla Jóni

Skúli Jón Friðgeirsson, leikmaður sænska úrvalsdeildarfélagsins Elfsborg, hefur lítið fengið að spreyta sig með liðinu að undanförnu. Til greina kemur að hann verði lánaður til liðs í sænsku B-deildinni.

Skúli Jón sagði í samtali við Fréttablaðið að enn væri óljóst hvort yrði af þessu en að hann myndi funda með viðkomandi félagi innan skamms.

Elfsborg er sem stendur í fimmta sæti í sænsku úrvalsdeildinni en liðið er ríkjandi meistari í Svíþjóð. Liðið keppti gegn lettneska liðinu Daugava í gær, 4-0, á útivelli. Samanlagt vann Elfsborg stórsigur, 11-1.

Skúli Jón fór ekki með til Lettlands en hann hefur ekkert komið við sögu í sænsku deildinni í ár. Í fyrra spilaði hann alls fimm leiki, þar af einn í byrjunarliði.