Fleiri munu fylgja í fótspor Hitzlsperger

Gordon Taylor, framkvæmdarstjóri samtaka knattspyrnumanna á Englandi, telur að yfirlýsing Thomas Hitzlsperger í vikunni muni hjálpa öðrum samkynhneigðum knattspyrnumönnum að koma úr skápnum.

Hitzlsperger er 31 árs gamall Þjóðverji sem lék lengi á Englandi með Aston Villa, West Ham og Everton. Hann lagði skóna á hilluna í haust en opinberaði í vikunni samkynhneigð sína.

Hitzlsperger er fyrsti leikmaðurinn sem lék í ensku úrvalsdeildinni sem kemur úr skápnum en Taylor spáir því að fleiri muni nú fylgja í kjölfarið.

„Það er ekkert að óttast og það sama má segja um knattspyrnukonurnar okkar. Ef fleiri stíga þetta skref er það vísbending um að heilbrigt umhverfi í knattspyrnuheiminum,“ sagði Taylor.

„Hér áður fyrr var komið fram við [samkynhneigða] líkt og um glæpamenn væri að ræða. En þetta er tákn um betri tíma.“