Mazda, Subaru og Mitsubishi græða

Japönsku bílaframleiðendunum gengur vel þessa dagana enda njóta þau mjög lækkunar yensins sem féll um 24% í fyrra. Mazda hagnaðist um 58 milljarða króna á fjórða ársfjórðungi síðasta árs og er hagnaðurinn nú 163% meiri en á sama ársfjórðungi árið 2012.

Sala Mazda bíla jókst um 15% og nam 322.000 bílum á þessum þremur mánuðum. Mazda spáir góðu uppgjöri við enda uppgjörsársins, sem endar 31. mars, eða 122 milljarða hagnaði sem myndi þá þrefalda hagnaðinn frá fyrra ári. Mazda áætlar að selja 1,325 bíla í ár, 7% meira en í fyrra.

Subaru hagnaðist um 90 milljarða á síðasta ársfjórðungi og sexfaldaðist hagnaður fyrirtækisins milli ára. Subaru seldi bíla af miklum móð í Bandaríkjunum en hluti hagnaðar Subaru nú er vegna sölu á snjóbílaframleiðsluhluta fyrirtækisins.  

Mitsubishi hagnaðist um 46 milljarða króna, sem er fjórum sinnum meira en árið á undan. Samanlagður hagnaður fyrirtækjanna þriggja á síðasta ársfjórðungi var því 194 milljarðar og víst að þau munu öll skila flottu ársuppgjöri og þetta ár lítur mjög vel út hjá þeim öllum.