Golf 40 ára

Þann 29. mars árið 1974 rann fyrsti Volkswagen Golf-bíllinn af færibandinu í Wolfsburg í Þýskalandi. Hann selst enn í gríðarlegu magni, nú af sjöundu kynslóð bílsins. Volkswagen Golf hefur selst í yfir 30 milljón eintökum á þessum 40 árum.

Svo vel var nýjustu kynslóð bílsins tekið í fyrra að hann var bæði kjörinn bíll ársins í Evrópu sem og heiminum öllum. Golf var í upphafi hugsaður af Volkswagen sem arftaki Bjöllunnar og hefur sannarlega staðið undir því nafni. Stærsta breytingin var fólgin í því að hafa vélina frammí bílnum og með framhjóladrifi. Það hefur haldist allt til dagsins í dag, þó svo fá megi Golf með fjórhjóladrifi nú að auki.

Bjallan seldist í 21,5 milljón eintökum á sínum tíma, svo Golf hefur nú gert gott betur en Bjallan gamla í sölu. Golf var strax svo vel tekið að í október árið 1976 var strax búið að selja 1 milljón bíla, aðeins rúmum tveimur árum eftir kynningu hans. 

Fyrsti Golf GTI bíllinn sá dagsins ljós árið 1976 og sama ár kom fyrsti Golf-inn með dísilvél. Golf með blæju kom svo á markað árið 1979 og var hann lengi vel söluhæsti blæjubíll í heimi. Fyrsti fjórhjóladrifni Golf kom svo fram þetta sama ár, 1979. Fyrsti Golf-inn með beinni innspýtingu (FSI) kom fram árið 2002 og það ár kynnti Volkswagen einnig Golf R32 með 6 strokka vél sem náði 250 km/klst og næsta ár þar á eftir fékk sá bíll DSG-skiptingu með tvöfaldri kúplingu. 

Sjötta kynslóð Golf seldist í tæplega 3 milljónum eintaka á 4 árum frá 2008 til 2012 og eyðslugrennsta útgáfa hans notaði aðeins 3,8 lítra á hverja 100 kílómetra. Sjöunda kynslóð bílsins var svo kynnt í september á síðasta ári og léttist bíllinn um 100 kg milli kynslóða og var byggður á MQB undirvagninum, sem svo margir bílar Volkswagen bílafjölskyldunnar eru byggðir á í dag. 

Nú má fá Golf sem gengur einungis fyrir rafmagni og kemst hann 190 km á hleðslunni. Síðastliðið sumar var 30 milljónasti Golf-bíllinn smíðaður og má búast við að þeir verði orðnir 31 milljón síðari hluta næsta sumars.