Pirlo á mörg góð ár eftir

Aldur virðist vera afstæður í tilviki Ítalans Andrea Pirlo. Hann er að verða 35 ára en hefur sjaldan eða aldrei leikið betur.

Hann er nýbúinn að skrifa undir nýjan samning við Juventus til ársins 2016 en sér fyrir sér að hann geti vel leikið lengur.

"Ég hef ekkert íhugað hvenær ég leggi skóna á hilluna. Ég mun heldur ekki hætta á meðan ég hef styrkinn og þessa ástríðu í boltanum," sagði Pirlo.

Juventus er að rúlla upp ítölsku deildinni með Pirlo sem aðalmann. Liðið er einnig komið í undanúrslit í Evrópudeildinni og úrslitaleikurinn fer síðan fram á heimavelli Juve.

"Við viljum vinna þessa tvennu og það er mikil gulrót að úrslitaleikurinn sé á okkar velli. Þátttaka í keppninni hefur ekkert truflað okkur í deildinni."