Bílar

Lúxusbílaframleiðendur veðja á Brasilíu

Finnur Thorlacius skrifar
BMW jók sölu bíla sinna í Brasíliu um 90% á fyrstu 3 mánuðum ársins.
BMW jók sölu bíla sinna í Brasíliu um 90% á fyrstu 3 mánuðum ársins.
Efnahagur í Brasilíu hefur farið mikið batnandi á síðustu árum þó svo nú sé nokkurt bakslag. Efnamiklum Brasilíumönnum hefur fjölgað um meira en helming frá árinu 2002.

Af einstökum löndum er Brasilía fjórði stærsti bílamarkaður í heimi og Brasilía er sjöundi stærsti bílaframleiðandi í heimi. Sum af stærri bílafyrirtækjunum eru með verksmiðjur þar, en fáir af lúxusbílaframleiðendunum.

Sala á lúxusbílum í Brasilíu jókst um 32% á fyrsta ársfjórðungi þessa árs þrátt fyrir að heildarsala bíla hafi fallið um 5%. Ástæða þess er ekki bara fólgin í bættum efnahag heldur einnig gjaldabreytingum frá brasilíska ríkinu, en álögur á dýrari bíla hafa lækkað. Ennþá eru þó sérstök gjöld á bíla sem framleiddir eru utan Brasilíu og því hafa sumir bílaframleiðendur sett upp verksmiðjur þar til að sneiða hjá þessum gjöldum.

Það hefur Mercedes Benz þó ekki enn gert en hyggst breyta því með opnun verksmiðju árið 2016. BMW er langt komið með uppsetningu verksmiðju í Brasilíu og mun hún opna á þessu ári. BMW jók söluna um 90% á fyrstu 3 mánuðum ársins í Brasilíu, en Benz aðeins um 30%.

Fleiri lúxusbílaframleiðendur eru einmitt að reisa bílaverksmiðjur í Brasilíu og ætlar Jaguar/Land Rover að opna eina slíka árið 2016 og það hyggst Audi einnig gera. Þetta gera öll þessi fyrirtæki þrátt fyrir bakslagið í efnahagi landsins nú, en trú þeirra byggir á því að það sé aðeins tímabundið bakslag og að efnameira fólki muni áfram fjölga verulega í Brasilíu, en það eru tilvonandi kaupendur bíla þeirra.

Mest lesið




×

Mest lesið