Bílar

408 hestöfl og 1,9 lítra eyðsla

Finnur Thorlacius skrifar
Audi TT Offroad.
Audi TT Offroad.
Það eru ekki slæmar tölur sem Audi TT Offroad bíllinn skartar, en hann var fyrst sýndur almenningi á bílasýningunni í Peking nýlega, sem hugmyndabíll. Þessi bíll verður líklega einn af nokkrum gerðum TT-bíla, en Audi hefur hugsað sér að búa til heila fjölskyldu TT-bíla.

Þessi tiltekni bíll er einskonar jepplingur en þó ekki af neinni venjulegri gerð. Fyrir það fyrsta er hann tvinnbíll sem eigendur hlaða heima hjá sér, en hann er líka ákaflega öflugur bíll með sín 408 hestöfl og sendir þau að sjálfsögðu til allra hjólanna. Aflið kemur frá 2,0 lítra forþjöppuvél sem er 292 hestöfl og rafmótorum bæði framan og aftan sem bæta við 116 hestöflum. Samtals er tog drifrásarinnar 650 Nm.

Með öllu þessi afli er hann aðeins 5,2 sekúndur í hundraðið og hámarkahraði hans er takmarkaður við 250 km/klst. Þetta eru allt ágætar tölur en það sem eflaust mestu máli skiptir er að bíllinn eyðir aðeins 1,9 lítrum. Auk þess er hann einkar umhverfisvænn og mengar aðeins 45 g/km af CO2. Hann hlýtur því að fá frítt í tvö stæði í Reykjavík í 90 mínútur í senn!

Fyrstu 50 kílómetrana má aka aðeins á rafmagni og heildardrægni bílsins er 880 kílómetrar.  Í bílnum er stór 12,3 tommu aðgerðaskjár og stjórnar bílstjórinn flestu því sem stjórna má í framúrstefnulegri þrívíddargrafík.

Mest lesið




×

Mest lesið