38% aukning á milli ára í Eystri Rangá

Eystri Rangá er greinilega komin i gang og veiðimönnum til mikillar ánægju er stærsti hluti aflans vænn tveggja ára lax.

Þegar veiðibækurnar eru skoðaðar vikuna 10-17. júlí kemur í ljós að aukning í veiði er 38% frá því í fyrra sem þó var metár á landsvísu og þessi aukning kemur því vel á óvart því líklega töldu fáir að hægt væri að gera betur og hvað þá á sumri eins og núna sem stefnir í að vera undir meðallagi víða.  Í samanburði gaf þessi vika 184 laxa í fyrra en núna hafa veiðst 253 laxar sömu viku og það er góður kraftur í göngum þessa dagana.  Þrátt fyrir að áin hafi verið bólgin og veður veiðimönnum ekki hagstætt hefur það lítið stoppað góða veiði og samt er sá tími framundan sem veiðin er best.  Það má þess vegna reikna með að það styttist hratt í 100 laxa daga í ánni.