Moyes orðaður við Inter

Það er farið að hitna hressilega undir Walter Mazzarri sem þjálfara Inter frá Milanó í ítölsku A-deildinni í fótbolta. David Moyes fyrrum þjálfari Manchester United og Everton er orðaður við starfið.

Inter mætir Cesena í deildinni í dag og tapi Inter stigum í leiknum er ekki talið ólíklegt að dagar Mazzarri hjá Inter verði taldir en liðið er sem stendur í níunda sæti deildarinnar sem þykir óásættanlegt hjá Inter.

Moyes hefur látið hafa eftir sér að það heilli hann að reyna fyrir sér í þjálfun utan Bretlandseyja og er hann talinn vænlegur kostur fyrir Inter verði Mazzarri látinn fara.

Massimo Moratti fyrrum eigandi og forseti Inter sagði af sér heiðursembætti sínu hjá félaginu á föstudaginn eftir að hann gagnrýndi Mazzarri opinberlega. Moratti fjölskyldan á enn þriðjung í félaginu en Erick Thohir meirihlutaeigandi í Inter stendur enn með þjálfaranum.

Inter hafnaði í fimmta sæti ítölsku A-deildarinnar á síðustu leiktíð og leikur í Evrópudeildinni í ár. Væntingar félagsins eru að komast í Meistaradeildina og því víst að þolinmæðin fyrir slökum árangri verði senn á þrotum.