Ragnar: Tek bekkjarsetunni eins og maður

Ragnar Sigurðsson, leikmaður Krasnodar í Rússlandi, segist ánægður með félagsliði sínu og að ekkert ósætti hafi komið upp við þjálfara sinn þar þó svo að hann hafi nýlega verið settur á bekkinn.

„Það var bara í einum leik, þannig séð, þar sem ég fékk hvíld í öðrum þar sem ég var á bekknum. En eftir 5-1 tapið fyrir Wolfsburg í Evrópudeildinni taldi þjálfarinn greinilega að það hafi verið meira mér að kenna en öðrum.“

„Ég tek því eins og maður og er ekkert ósætti við þjálfarann. Þetta var bara einn leikur og ég ætla því að halda ró minni yfir þessu og sjá hvernig þetta muni þróast. Annars líkar mér ágætlega hjá félaginu,“ sagði Ragnar.

Fregnir af því að staðið hafi á launagreiðslum til leikmanna liða í rússnesku úrvalsdeildinni eiga ekki við um Krasnodar að sögn Ragnars. „Það er ekkert slíkt í gangi hjá þessum klúbbi og verður aldrei,“ sagði hann.

Gengi Krasnodar hefur verið misjafnt á tímabilinu til þessa. Liðinu gengur vel í deildinni þar sem það er í þriðja sæti og einu stigi á eftir stórliði CSKA Moskvu. Hins vegar hefur liðið ekki enn unnið leik í Evrópudeildinni og er í neðsta sæti H-riðils með tvö stig.

„Einu vonbrigðin í deildinni til þessa voru að missa niður 2-0 forystu gegn [toppliði] Zenit og tapa fyrir nýliðum á heimavelli. En gengið í Evrópudeildinni hafa klárlega verið okkur vonbrigði,“ segir hann.

„Við áttum að vinna fyrstu tvo leikina okkar, gegn Lille á útivelli og Everton heima, en eftir það hefur það bara versnað.“

Honum líkar vistin vel í Krasnodar sem er ekki langt frá Svartahafi, rétt austan við landamærin við Úkraínu. „Ég bý í fínu húsi með kærustunni minni og við höfum það bara gott. Það eru flottir veitingastaðir í borginni og þetta er bara kósí - vídeó og chill á kvöldin.“

Hann segist vera í góðu standi fyrir leikinn í Belgíu í kvöld þó svo að leikjaálag síðustu vikna hafi verið farið að segja til sín. „Liðið hefur verið að spila þrjá leiki í viku síðustu vikurnar og því leit ég á bekkjarsetuna sem góða hvíld. Við vitum ekki hvernig byrjunarliði verður hjá okkur gegn Belgíu en ég vonast til að spila að minnsta kosti í hálftíma.“