Morgun og kvöldvakt gáfu samtals 71 lax

Það er óhætt að segja að það sé góður gangur í Norðurá en mikill kraftur er í göngunum í ánna.

Á hádegi í gær voru komnir 540 laxar á land sem er frábær veiði með tilliti til að heildarveiðin í fyrra var 924 laxar. Í gær fengum við þær fregnir frá Einari Sigfússyni að tvær vaktir hafi tekið 71 lax og mikið slapp þar sem tökurnar eru mjög grannar í því blíðskaparveðri sem hefur leikið um Borgarfjörðinn.

"Það er svakalega mikið líf í ánni og frá Laxfossi og niður er hún bara blá af laxi og það er stanslaust að ganga inn fiskur" sagði Einar Sigfússon þegar við spjölluðum við hann. Veiðimenn sem hafa verið að koma úr ánni taka undir þetta og nú bíða menn spenntir eftir því að laxinn fari að ganga í meiri mæli upp Glanna en þá verður efra svæðið í Norðurá vel virkt.

Miðað við gang mála er því alveg óhætt að spá því að Norðurá gæti endað í 1400-1500 löxum í sumar sem verður miðað við gang mála í dag að teljast ansi hógvær spá.