El Shaarawy kominn til Monaco

Stephan El Shaarawy er genginn í raðir franska úrvalsdeildarliðsins Monaco frá AC Milan.

El Shaarawy gerði eins árs lánssamning við Monaco en félagið á möguleika á að kaupa hann fyrir 16 milljónir evra á meðan á lánstímanum stendur.

El Shaarawy var á sínum tíma ein helsta vonarstjarna Milan og ítalska landsliðsins en síðustu ár hafa verið erfið hjá honum vegna meiðsla.

El Shaarawy, sem á egypskan föður, kom til Milan frá Genoa 2011 og skoraði 27 mörk í 101 leik fyrir félagið. Hann hefur leikið 13 A-landsleiki fyrir Ítalíu og skorað eitt mark.

Monaco endaði í 3. sæti frönsku úrvalsdeildarinnar í fyrra og komst auk þess í 8-liða úrslit Meistaradeildar Evrópu.