BMW 7 á að taka fram S-Class

BMW segir að hin nýja 7-lína fyrirtækisins taki um margt fram Mercedes Benz S-Class. BMW mun formlega kynna nýja 7-línu þann 24. október. BMW vill meina að 7-línan verði mun eyðslugrennri, mengi minna og hafi lengri drægni með rafmótorum en samskonar gerð S-Class.

BMW 740e Plug-In-Hybrid mengar 49 g/km af CO2 á meðan S-Class Plug-In-Hybrid mengar 65 g/km. S-Class kemst fyrstu 33 km á rafmagni eingöngu en BMW-inn 40 km. BMW 7 á að verða fyrsti bíllinn sem leggur sjálfur í stæði án þess að bílstjóri sé í bílnum. Þá munu handarhreyfingar bílstjóra duga til að stjórna ýmsu í bílnum, svo sem að hækka og lækka í tónlist, svara símtölum ofl.

Bíllinn verður með nýja gerð laser-aðalljósa sem lýsa 600 metra fyrir framan bílinn. Í bílnum er þráðlaus nettenging og hlaða má Android farsíma þráðlaus. Eyðsla bílsins hefur minnkað allt að 20%, ekki síst vegna þess að ný kynslóð bílsins er 130 kg léttari þar sem koltrefjar eru nú notaðar að miklu leiti í yfirbyggingu bílsins.

Ný kynslóð BMW- 7-línunnar er sú sjötta í röðinni en BMW hefur selt 370.000 eintök af síðustu kynslóð bílsins en ætlar að gera enn betur með þeirri nýju. Mest seldi BMW 67.200 7-línu bíla árið 2011. Það telst þó ekki mikið miðað við þau 100.000 eintök sem Mercedes Benz seldi í fyrra af S-Class bíl sínum.