Matargleði Evu Laufeyjar: Ljúffengt basilíkupestó

Í síðasta þætti af Matargleði Evu á Stöð 2 útbjó hún ótrúlega girnilegt basilíkupestó eins og henni einni er lagið.

Eva Laufey Kjaran Hermannsdóttir er einn af okkar allra bestu sjónvarpskokkum en hér að neðan má bæði sjá hvernig hún gerir pestóið og einnig uppskriftina.

Eva útbýr pasta til að hafa með pestóinu og fer þetta tvennt mjög vel saman. 

Basilíkupestó

Handfylli basiílka

Handfylli klettasalat

2-3 dl kasjúhnetur

Safi af hálfri sítrónu

1 dl nýrifin parmesan ostur

Salt og nýmalaður pipar

Ólífuolía, magn eftir smekk

Aðferð: Setjið öll hráefnin í matvinnsluvél eða maukið með töfrasprota, ef ykkur finnst pestóið of þykkt notið þið einfaldlega meiri ólífuolíu.

Pastaréttur:

400 g penne pasta

ólífuolía

2 hvítlauksrif

2 skallottulaukar

½ rautt chili

½ spergilskálshöfuð

Parmesan ostur

1 askja kirsuberjatómatar

Salt og nýmalaður pipar

Aðferð: Sjóðið spergilkál í nokkrar mínútur í vel söltu vatni, á meðan steikið þið lauk, hvítlauk og chili upp úr ólífuolíu á pönnu. Skellið spergilkálinu út á pönnuna og steikið, lækkið hitann. Sjóðið pasta í vatninu sem spergilkálið var í samkvæmt leiðbeiningum á pakkanum. Eftir þann tíma hellið þið vatninu frá en gott er að geyma einn bolla af soðinu til þess að bæta út á pönnuna seinna meir. Steikið pastað á pönnunni í 10 mínútur. Kryddið til með salti og pipar, rétt í lokin skerið þið nokkra kirsuberjatómata og bætið út á. Berið fram með nóg af ferskum nýrifnum parmesan osti.