Fyrstu laxarnir mættir í Laxá í Kjós

Veiðimenn geta núna farið að telja niður dagana í að fyrstu laxveiðiárnar opna en ekki nema 3 vikur eru í að veiði hefjist.

Eitt af því sem kveikir verulega í veiðimönnum eru fregnir af fyrstu löxunum sem sýna sig og það virðist vera þannig ár eftir ár að alltaf skulu fyrstu laxarnir mæta í Laxá í Kjós.  Í það minnsta þeir fyrstu sem láta sjá sig.  Það eru fáar ár með snemmgengna stofna hér á landi en Laxá í Kjós, Norðurá, Þverá og Blanda eru venjulega að gefa fyrstu laxana á hverju tímabili og sýna þá fyrstu líka.

Í morgun sá Bubbi Morthens fyrstu laxana í Kjósinni og fleiri hafa rennt þangað síðan og kíkt á þessa laxa.  Það voru greinilega mættir laxar því lax sást í Kvíslafossi og annar í Laxfossi.  Það er oft og iðullega sem fyrstu laxarnir sýna sig í Laxá í Kjós um miðjan maí og fyrst þeir eru mættir þá fara hjörtu veiðimanna að slá hraðar og fleiri draumar um veiði að vitja manna um nætur.