Ferðalok Nathans Drake

Fjársjóðsleitarmaðurinn Nathan Drake er snúinn aftur í síðasta sinn í besta Uncharted-leiknum hingað til. Eftir að hafa sest í helgan stein með Elenu Fisher, eiginkonu sinni úr fyrri leikjum seríunnar, er Drake knúinn til þess að sýna gamla takta eftir að eldri bróðir hans, Sam, snýr aftur frá dauðum. Til að bjarga lífi Sams þurfa þeir Drake að finna sama sjóræningjafjársjóðinn og þeir leituðu að á sínum yngri árum.

Uncharted-leikirnir hafa notið gífurlegra vinsælda frá því að sá fyrsti kom út árið 2007. Þá þurfti Drake að finna týndu borgina El Dorado, en síðan þá hefur hann fundið fleiri forna fjársjóði.

Sem áður snýst ævintýri Nathans Drake um að elta uppi vísbendingar víða um heiminn og leysa þrautir og gátur og gera það á undan hópi málaliða sem ætla sér að finna fjársjóðinn á undan Drake.

Sjá einnig: Endurfæddur Nathan Drake

Skotbardagar eru ekki sterkasti hluti leiksins en Uncharted skín þegar spilarar þurfa að leysa gátur leiksins. Þæreru oft og tíðum mjög krefjandi og hönnun borða er einstaklega vel gerð. Mörg borð leiksins eru í raun opin þar sem hægt er að fara margar leiðir til að leysa verkefni sem liggja fyrir. Þar að auki er oft og tíðum hægt að laumast fram hjá óvinum í stað þess að berjast við þá. Svæði leiksins eru mun stærri en þau hafa verið í fyrri leikjum seríunnar.

Hvað grafík varðar hafa starfsmenn Naughty Dog svo sannarlega unnið vinnuna sína. Persónur leiksins virðast lifandi í atriðum inn á milli borða og umhverfi ATE er mjög flott. Fjölbreytt borð leiksins líta mjög vel út og óhætt er að segja að Uncharted 4 sé einstakur leikur.

Lokakafli sögunnar um Nathan Drake er einstaklega flottur og skemmtilegur. Uncharted 4: A Thief’s End sýnir hve góður miðill tölvuleikir eru fyrir frábæra sögusköpun á stórfenglegan hátt.