1.000 Porsche 911 GT2 RS seldust á augabragði

Porsche kynnti nýjan 911 GT2 RS bíl í Los Angeles rétt um daginn og nú þegar eru þau 1.000 eintök af honum seld sem til stendur að smíða af bílnum. Hátt verð bílsins hefur ekki fælt þessa eitt þúsund kaupendur bílsins frá, en þeir þurfa að greiða 260.000 evrur fyrir eintakið, eða tæplega 31 milljón króna.

Porsche 911 GT2 RS er enginn letingi með sín 700 hestöfl sem koma frá 3,8 lítra vél með tveimur forþjöppum. Er þetta sama vél og finna má í Porsche 911 Turbo S. Þetta afl dugar honum til að ná 100 km hraða á 2,9 sekúndum og ná hámarkshraðanum 341 km/klst.

Bíllinn er aðeins 1.500 kíló, en talsverð notkun koltrefja hjálpar til að gera bílinn svo léttan. Porsche 911 GT2 RS er risastóran afturvæng og ýmsar aðrar breytingar frábrugna hefðbundnum 911 bílum sem tryggja að hann liggi eins og klessa á veginum, eða kappakstursbrautunum en þessi bíll er hæfur til brautaraksturs eins og hann kemur frá framleiðanda.

Sala þessara 1.000 eintaka af Porsche 911 GT2 RS tryggir Porsche 31 milljarða tekjur, eingöngu af þessari einu bílgerð sem framleidd verður í takmörkuðu magni. Það er þó aðeins dropi í hafið hjá þýska sportbílaframleiðandanum, en í fyrra seldi Porsche 237.778 bíla og þar af 32.409 Porsche 911 bíla. Mest sala Porsche er í Macan, Cayenne og 718 bílunum.