Allir bílar Opel rafmagnaðir árið 2024

Í nýrri rekstraráætlun Opel/Vauxhall, sem nú heyrir undir PSA Peugeot-Citroën, er meðal annars kveðið á um að allir bílar Opel/Vauxhall verða knúnir rafmagni árið 2024 að öllu leiti eða að hluta. Í þessari nýju áætlun er einnig gert ráð fyrir því að bílar Opel/Vauxhall verði með sama undrivagn og aðrir Peugeot-Citroën bílar mun fyrr en áður var áætlað og verður sú breyting að fullu gengin í gegn einnig árið 2024. Mun undivögnum Opel/Vauxhall bíla verða fækkað úr níu núverandi gerðum í tvær og vélargerðum úr tíu núverandi í fjórar. Opel Corsa verður til dæmis komin með undirvagn frá Peugeot-Citroën árið 2019.

Opel/Vauxhall mun kynna nýjan bíl á hverju ári, auk kynninga á nýjum kynslóðum núverandi bílgerða, alls 9 gerðir bíla áður en árið 2020 er gengið í garð. Opel/Vauxhall ætlar meðal annars að kynna nýjan stóran jeppa sem mun teljast flaggskip merkisins. Í nýjum áætlunum Opel/Vauxhall er einnig markmið um að fyrirtækið verði leiðandi evrópski bílaframleiðandinn í minnkandi CO2 mengun og er rafvæðing bílaflota þess þáttur í því markmiði. Árið 2020 áætlar Opel/Vauxhall að bjóða einar fjórar gerðir hreinræktaðra rafmagnsbíla og nokkrar tegundir tengiltvinnbíla.

Hönnunarmiðstöð Opel í Russelsheim verður ábyrg fyrir öllum framtíðarbílum fyrirtækisins og mun að auki þjóna allri PSA bílasamstæðunni og fær því í raun aukið hlutverk. Þar munu því þýskir og franskir verkfræðingar vinna hönd í hönd við þróun Peugeot, Citroën og Opel/Vauxhall bíla. Enn eitt markmiðið í nýrri áætlun fyrir Opel/Vauxhall er að bjóða bíla þess á 20 nýjum mörkuðum fyrir árið 2022 og með því gera Opel/Vauxhall merkið alþjóðlegra, en því var haldið frá ákveðnum mörkuðum er það var í eigu General Motors. Allar þessar áætlanir eru náttúrulega liður í því að gera Opel/Vauxhall að arðsömu fyrirtæki, en þegar það var í eigu GM náðist aldrei að gera það arðsamt.