Ef að það yrði ákveðið að HM yrði á Íslandi 2022

Íslenska karlalandsliðið tekur næsta sumar þátt í sínu fyrsta heimsmeistaramóti þegar strákarnir okkar verða með á HM í Rússlandi.

Þessa dagana er íslenska landsliðið hinsvegar við æfingar í Katar þar sem liðið hefur spilað einn vináttulandsleik við Tékkland og mun spila annan við Katar í næstu viku.

Það er einmitt í Katar þar sem næsta heimsmeistarakeppni, á eftir þeirri í Rússlandi, mun fara fram eftir fimm ár eða í lok ársins 2022.

Elvar Geir Magnússon, blaðamaður á netmiðlinum Fótbolti.net er staddur út í Katar, þar sem hann fylgir íslenska landsliðinu eftir á þessu æfingamóti í Katar.

Elvar Geir skrifar skemmtilegan pistil á Fótbolti.net síðuna í dag þar sem hann fer yfir upplifun sína af Katar þar sem heimsmeistarakeppnin fer fram frá 21. nóvember til 18. desember 2022.

„Góðærið er komið aftur, öflugra en nokkru sinni fyrr. Ákveðið hefur verið að HM verði haldið á Íslandi 2022, “ byrjar Elvar Geir pistil sinn.

„Borgarlínan verður gerð í snatri, sporvagnar munu flytja fólk milli valla, og flutt verður vinnuafl frá Skandinavíu, Færeyjum og Grænlandi til að vinna við óboðlegar aðstæður við að reisa átta nýja leikvanga,“ skrifar Elvar.

Hann segir það sé skemmtilegt að ímynda sér hvernig Ísland væri ef við hefðum olíu og gas á við Katar, eitt ríkasta land heims

Það er hægt að lesa allan pistil Elvars Geirs hér en þar bendir hann meðal annars á þá staðreynd að það væri hægt að koma öllum staðsetningum HM-leikvanganna í Katar inn á Faxaflóa. Það er ótrúlega stutt á milli alla keppnisvallanna og það verður því vel hægt að fara á tvo HM-leiki á sama degi fái maður á annað borð miða.

Við mælum með að lesa pistil Elvars til að átta sig betur á aðstæðum í þessu litla furstadæmi við Persaflóann.