Mótherjar Íslands í sumar mega fá eiginkonurnar og kærusturnar í heimsókn á HM

Nígería er í riðli með Íslandi á HM í fótbolta í Rússlandi í sumar og verður annar mótherji íslenska liðsins á mótinu á eftir Argentínu.

Gernot Rohr, þjálfari nígeríska landsliðsins, ætlar ekki að koma í veg fyrir samskipti leikmanna við eiginkonur sínar eða kærustur á meðan heimsmeistaramótinu stendur.

Rohr hefur nú gefið það út að eiginkonurnar og kærustur megi reglulega heimsækja mennina sína í búðir liðsins á meðan mótinu stendur. Hann ræddi þetta á blaðamannafundi en Gernot Rohr telur að þetta hjálpi leikmönnum að einbeita sér betur að fótboltanum.

„Eftir hvern leik þá leikmenn einn dag þar sem þeir mega bjóða til síns eiginkonum, kærustum eða öðrum fjölskyldumeðlimum, slaka á með þeim og hafa gaman. Þetta mun hjálpa leikmönnunum andlega og stuðla að meiri einbeitingu fyrir næsta leik,“ sagði Gernot Rohr.

„Það verður gott fyrir leikmennina mína að hitta fjölskyldur sína eftir langt tímabil í Evrópu,“ sagði Gernot Rohr og hann hefur fullan stuðning frá nígeríska fótboltasambandinu.

„Rohr ræður þessu alveg sjálfur. Ég veit að önnur lið gera þetta líka en þetta stendur og fellur með vilja þjálfarans. Þetta mál er á hans borði,“ sagði Amaju Pinnick forseti nígeríska knattspyrnusambandsins.

Amaju Pinnick segir að allt verði gert fyrir leikmennina. Þeir munu því fá dagpeninga, bónusa og gott starfslið í kringum sig. „Við viljum ná langt og ætlum ekki að láta neitt svoleiðis stoppa okkur,“ sagði Pinnick.

Íslenska landsliðið mætir Nígeríu í Volgograd 22. júní eða sex sögum eftir að liðin spila sinn fyrsta leik á heimsmeistaramótinu, Nígería á móti Króatíu en Ísland á móti Lionel Messi og félögum í Argentínu.