Chanel taska Selmu ekki ekta: „Ég borgaði 10 sinnum minna“

„Magnað hvað lítil fyrirsögn um Chanel tösku hefur vakið mikla athygli vina minna og kunningja,“ segir leikstjórinn, leikkonan og söngkonan Selma Björnsdóttir í stöðufærslu til vina sinna á Facebook.

Þar nefnir hún til sögunnar frétt sem birtist á vefsíðunni mbl.is undir fyrirsögninni „Selma mætti með Chanel-tösku“ og birtist hún í gær.

Selma mætti á opnun Storytel á Íslandi með tösku sem fangaði athygli miðilsins.

„Takk kæru vinir fyrir lol skilaboðin og linkinn sem ég hef fengið sendan býsna oft. Ég er mjög ánægð með þessa tösku, og hún er að sjálfsögðu ekta gervi enda dytti mér aldrei í hug að kaupa mér tösku fyrir 450.000 krónur.“

Selma segir að það sjáist nákvæmlega enginn munur á sinni tösku og þeirri sem komi frá Chanel.

„En ég borgaði 10 sinnum minna. Góðar stundir.“