Augnablikið þegar Elísabet sá fjölskylduna sína í fyrsta sinn

„Þetta er voðalega sætt og aðalpersónan er mjög falleg og augnablikið líka,“ segir Eva Hrönn Jónsdóttir, móðir Elísabetar Evu Gretarsdóttur, sem setti upp gleraugu í fyrsta sinn á ævi sinni í gær.

Elísabet er 16 mánaða gömul og hefur í raun aldrei séð heiminn eins og hann er í raun og veru. Í gær sá hún fjölskyldu sína í fyrsta sinn og var augnablikið fest á filmu.

„Hún hefur væntanlega ekkert séð frá fæðingu. Hún var farinn að vera aðeins rangeygð í febrúar og ég fór með hana til augnlæknis í mars. Ég hélt kannski að hún væri tileygð en hún var í raun að hvíla annað augað til að reyna ná að sjá í fókus. Augnlæknirinn mældi hana með +8 á báðum augum og svo fengum við gleraugun loksins í gær.“

Eva segir að Elísabet hafi skoðað umhverfi sitt vel alveg síðan að hún fékk gleraugun.

„Hún er að horfa mjög vel á allt í kringum sig, sem er kannski ekki skrýtið því hún er að sjá allt í fyrsta skipti. Bækur og dót eru að heilla hana og hún sat t.d. í fyrsta skipti í gær og horfði á sjónvarpið með systur sinni,“ segir Elísabet en hér að neðan má sjá þetta einstaka augnblik, þegar Lísa sá í fyrsta sinn.