Björn Bergmann: Held að enginn hafi búist við að ég myndi fara á HM

Björn Bergmann Sigurðarson, framherji íslenska landsliðsins í fótbolta, var brosið eitt í sólinni á Laugardalsvelli í hádeginu í dag þegar að strákarnir okkar æfðu en undirbúningur fyrir HM 2018 er á byrjunarstigi hjá íslenska liðinu.

Fjölmiðlar fjölmenntu, bæði íslenskir sem erlendir, enda spennan fyrir mótinu að aukast og áhugi erlendra fjölmiðla á strákunum okkar mikill.

„Þetta er byrjað að vera svolítið spennandi. Nú erum við fyrst að koma saman að gera okkur klára fyrir HM. Spennan er að magnast,“ segir Björn Bergmann við Vísi.

Strákarnir okkar verða lengi saman í aðdraganda HM sem Björn segir auðveldara en að eyða fleiri vikum með félagsliðum á undirbúningstímabili.

„Hér er allt miklu léttara og manni líður betur hérna. Við erum náttúrlega allir Íslendingar og allir góðir félagar. Það er gaman að vera kominn heim og að æfa á þessum velli,“ segir hann og fagnar því að sjá sólina loksins á klakanum.

„Svo er gott að fá loksins sól. Ég er búinn að vera á Íslandi núna í tíu daga og veðrið er búið að vera hræðilegt.“

Mikill léttir

Landsliðshópurinn var tilkynntur ellefta maí og bjóst enginn við öðru en að Björn Bergmann væri í hópnum enda orðinn klár þriðji kostur á eftir Jóni Daða og Alfreð Finnbogasyni.

„Þegar að maður vaknaði hugsaði maður um hvenær þetta yrði opinberað og hvenær við myndum fá að heyra þetta. Svo fékk ég sms klukkutíma áður en aðrir fengu að vita þetta,“ segir Björn. „Það var mjög mikill léttir að fá að heyra að maður sé í hóp og sé á leiðinni á HM. Þetta var góður dagur.“

Skagamaðurinn kom óvænt aftur inn í landsliðið í september 2016 en hann hafði þá ekki sést í blárri treyju A-landsliðsins í fimm ár, eða síðan hann þreytti frumraun sína á móti Kýpur haustið 2011.

Eins og Vísir fjallaði um á þeim tíma benti fátt til þess að Björn Bergmann myndi spila fyrir íslenska landsliðið enda svaraði hann ekki einu sinni símtölum landsliðsþjálfaranna.

Bjóst hann einhvern tíma við því á þessum tíma sem að hann var utan landsliðsins að hann myndi fara á HM með strákunum okkar? „Nei,“ svarar hann um hæl og brosir. „Ég held að enginn hafi búist við því.“

Verður áfram í Rostov

Björn Bergmann gekk í raðir rússneska liðsins Rostov í byrjun árs þar sem að hann skoraði eitt mark í sex leikjum. Hann er ánægður með fyrstu vikurnar í Rússlandi.

„Þetta gekk bara mjög vel, sérstaklega hjá mér sjálfum þrátt fyrir að liðinu hafi ekki gengið alveg nógu vel. Ég fór aðeins úr axlarlið fyrir þremur vikum og var frá í þrjár til fjórar vikur en náði svo síðasta leiknum og er góður núna,“ segir Björn sem verður áfram í Rostov.

„Ég er nýbúinn að skrifa undir og á þrjú ár eftir með Rostov. Ég fer aftur þangað. Það er bara þannig,“ segir Björn Bergmann Sigurðarson.

Allt viðtalið má sjá hér að neðan.