Gylfi getur ekki gert upp á mill Jóns Ragnars og Frikka Dórs | Myndband

Gylfi Þór Sigurðsson, landsliðsmaður Íslands í fótbolta, er eitt af nýjustu andlitum Pepsi Max í heiminum en í tilefni þess settist Hjörvar Hafliðason niður með honum og spurði hann nokkurra spurninga.

Afraksturinn má sjá á Facebook-síðu Pepsi Max á Íslandi en eftir að Gylfi var búinn að ræða alvarlegri hluti eins og markið geggjaða sem hann skoraði í vetur og daga sína á mölinni í Hafnarfirði var komið að léttari hlutum.

Hjörvar byrjaði á erfiðri spurningu: Hvort er Gylfi hrifnari af Jóni Ragnari Jónssyni eða bróður hans Friðrik Dór Jónssyni sem tónlistarmönnum?

„Ég get ekki svarað þessu. Þetta eru vinir mínir þannig að ég get ekki gert upp á milli þeirra. Ef ég væri með veislu á morgun myndi ég fá Jón Ragnar um daginn og Frikka eftir kvöldmat,“ segir Gylfi Þór.

Gylfi segist svo elska íslenskt vatn, íslenskan humar og íslenska náttúru og að hann myndi fara á uppistand með Ólafi Inga Skúlasyni sem hann segir fyndnasta leikmann sem að hann hefur spilað með.

Myndbandið má sjá hér að neðan.