Albert lék lukkudýr og gaf leikmönnum KR jólakort

Albert Guðmundsson, framherji íslenska landsliðsins í fótbolta, er svona rétt farinn að átta sig á því að strákarnir okkar eru mættir á heimsmeistaramótið í fótbolta en þetta hefur verið hálf óraunverulegt undanfarna daga og vikur heima á Íslandi.

Eftir tvo vináttuleiki gegn Noregi og Gana eru strákarnir komnir í öllu meiri ró, eins skrítið og það nú er. Á milli æfinga eru þeir í rólegheitum á hótelinu og njóta sín vel á þessum fyrstu dögum HM.

„Maður er svona að átta sig á því að maður er kominn á HM. Það er líka bara gott að komast í smá rólegheit og vera upp á hóteli og einbeita sér að leikjunum sem eru framundan,“ segir Albert, en hvað eru strákarnir að gera á hótelinu?

„Þetta er voða mikið tjill bara. Við erum með borðtennisborð, pool-borð, píluspjald og svo er sundlaug. Maður er mikið á bakkanum að fá smá lit. Það er mjög gott veður hérna, sem betur fer.“

„Maður var búinn að ímynda sér hvernig þetta yrði en nú er þetta orðið eins raunverulegt og það verður. Maður er að átta sig á því hversu stórt þetta er,“ segir Albert.

Albert er uppalinn hjá KR og leit á yngri árum upp til nokkurra leikmanna meistaraflokks liðsins. Tveir af þeim voru Theodór Elmar Bjarnason og Kjartan Henry Finnbogason.

Elmar var á HM 2016 með íslenska liðinu og báðir voru í baráttu um sæti í HM-hópnum. Þeir voru skildir eftir en Albert litli er mættur til Rússlands. Strákurinn sem heimsótti þá um hver jól á yngri árum.

„Þetta er mjög fyndið. Ég gaf þeim tveimur alltaf jólakort og studdi þá í einu og öllu. Ég veit líka að þeir styðja mig í þessu verkefni. Þeir eru bestir í KR á þessum tíma. Ég var tíu eða ellefu ára og leit fáránlega mikið upp til þeirra,“ segir Albert sem var einnig Rauða ljónið, lukkudýr KR, nokkrum sinnum þegar að hann var lítill.

„Maður tók það verkefni á sig stundum. Ég var eins mikið í bolta og ég gat og þarna sá ég möguleika á því að vera rautt ljón með fótbolta. Maður nýtti þetta tækifæri,“ segir hann og brosir.

Það er auðvitað stórt fyrir þennan unga framherja að vera kominn á HM en býst hann við einhverjum mínútum á mótinu?

„Ég held mér rólegum en auðvitað ætla ég frekar að búast við einhverju heldur en ekki þannig að ég verði klár þegar að kallið kemur. Ég ætla að vera klár og búast við einhverjum mínútum og vera þá 100 prósent einbeittur þegar að ég kem inn á,“ segir Albert Guðmundsson.

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á Facebook, Twitter og Instagram.