Volvo verður eingöngu rafbílaframleiðandi

Hakan Samuelsson yfirmaður hjá Volvo segir að markmið sænska framleiðandans sé að framleiða eingöngu rafbíla innan 20 ára. Hann segir að nákvæm tímalína skýrist eftir óskum neytenda.

Volvo kynnti nýlega fyrsta 100% rafbílinn sinn, sem er XC40 Recharge. Næsta markmið Volvo á vegferðinni er að rafbílar verði helmingur seldra Volvo bíla fyrir árið 2025.

Nýr rafbíll verður kynntur á hverju ári þangað til 2025 og allir nýjir bílar munu vera með einhverjum rafaflgjafa. Eins ætlar Volvo að gera verksmiðjur sínar umhverfisvænni og tryggja að þær gangi eingöngu fyrir endurnýjanlegri orku fyrir 2025.

„Þeir sem ákveða þetta á endanum eru neytendur. Því hærra hlutfall rafbíla sem keypt er því fyrr munum við loka á brunahreyfils framleiðsluna. Ef einungis lítið hlutfall seldra bíla eru brunahreyfils bílar þá hættum við sennilega fyrr að framleiða þá,“ sagði Samuelsson í samtali við AutoCar.co.uk.

Volvo hefur ekki staðfest hvaða bíll verður næstur í röð rafvæðingar. Fyrirtækið hefur hins vegar ákveðið að gefa ekki út sérstakar tegundir rafbíla heldur bjóða rafútfærslur af þeim tegundum sem fyrirtækið framleiðir nú þegar.