98 sm lax úr Miðfjarðará

Fyrsti laxinn sem mætti sannarlega kalla stórlax veiddist í Miðfjarðará í gær en eins og myndin ber með sér er þetta rígvænn og flottur lax.

Laxinn kom á land í Austuránni og það hafa verið að sjást laxar víða síðustu daga og þrátt fyrir að áinn sé frekar vatnsmikil er laxinn eins og oft í byrjun tímabilsins fljótur að fara upp á efri svæðin. Veiðin í Miðfjarðará var komin í 20 laxa í gær þegar tölur teknar saman í gær sem er svipað og í fyrra en aðstæður þá voru mun betri þrátt fyrir að göngur hafi verið litlar. Það er frekar mikið vatn í Miðfjarðará eins og öðrum ám á landinu þessa dagana og það er ljóst að veiðin á eftir að dafna þegar göngurnar verða stærri sem og þegar vatnið fer að sjatna. Það gæti samt tekið smá tíma í þessum landshluta þar sem það er ennþá mikill snjór í fjöllum. Það er þó engin að kvarta yfir miklu vatni og fyrirsjáanlegri góðri vatnsstöðu eftir þurrkasumarið í fyrra.