Hafið braut Þór

Þrettánda umferð Vodafonedeildarinnar í CS:GO fór fram fyrr í kvöld. Lokaleikur kvöldsins var Þór gegn Hafinu. Voru Þórsararnir á heimavelli og völdu þeir kortið Dust2. Gekk þeim vel að troða öldurnar í Hafinu sem þó sigraði jafnan leik að lokum 16 – 14.

Þórsararnir klifu brattann í fyrstu lotum leiksins. Eftir tvísýna fyrstu lotu sem Hafið hreinsaði snyrtilega upp virtist kortið vera læst með þéttum varnarleik (counter-terrorist) Hafsins. Fyrsta lota Þórs fékkst með þrekvirki ADHD (Kristófer Daði Kristjánsson). Var hann einn eftir á móti þremur leikmönnum Hafsins, með sprengjuna tifandi sóttu þeir á hann en felldi hann þá alla.

Þórsarar nýttu meðbyrinn vel, með mikilli kænsku þvinguðu þeir Hafið til að aðlaga vörnina að sóknarleiknum. En ítrekað settu þeir mikla pressu löngu leiðina á svæði A og varð Hafið að stilla upp gegn því með tilheyrandi tilfæringum og skapaði þetta glufur á vörninni.

Hlutirnir litu vel út fyrir Þór sem var að spila vörnina í sundur þar til þeir skullu á peter (Pétur Örn Helgason). Hann stóð sem klettur á svæði B og braut sóknina með 4 fellum. Sló þetta Þórsarana útaf laginu sem þó náðu einungis að kroppa tvær lotur til viðbótar gegn þéttri vörn Hafsins.

Staðan í hálfleik Hafið 9 – 6 Þór.

Vörn Þórs var þétt frá fyrstu lotu seinni hálfleiks. Liðsmenn Hafsins skullu á henni ítrekað en gekk ekki að brjóta hana upp. Það var fyrir hendingu að Hafið komst gegnum vörn Þórs og náði sér í lotu. Þórsararnir voru þó fljótir að þétta vörnina og virtist vörnina ætla að halda þar til staðan var 14 – 12 Þór í vil.

Er sigurinn var við það að renna þeim úr greipum kafaði Hafið djúpt. Maður Hafsins peter (Pétur Örn Helgason) sem hafði farið hamförum í leiknum hingað til og keyrt ófáar loturnar heim lét sig ekki vanta er þeir hertu á sóknarleiknum. Með viljastyrk og stáltaugum breytti Hafið gangi leiksins og tókst þeim að merja sigur úr hnífjöfnum leik.

Lokastaðan Hafið 16 – 14 Þór.