Bein útsending: Eva Rún og Salka í listamannaspjalli

Tinni Sveinsson skrifar 5. maí 2020 11:21

Eva Rún Snorradættir og Salka Guðmundsdóttir eru í beinni útsendingu í Borgarleikhúsinu í dag.

Borgarleikhúsið heldur áfram að bjóða upp á beint streymi í samkomubanni.

Í dag er komið að listamannaspjalli þar sem Eva Rún Snorradóttir og Salka Guðmundsdóttir leiða saman hesta sína.

Eva Rún og Salka eru núverandi og fyrrverandi leikskáld hússins. Þær ætla að ræða starf sitt innan Borgleikhússins og margt fleira.

Framundan hjá Borgó í beinni

Í hádeginu á miðvikudag ætlar frábær hópur leikara að taka lagið úr þeim fjölmörgu og skemmtilegu söngleikjum sem sýndir hafa verið undanfarin misseri. Þarna verða tekin lög úr Mamma Mia!, Billy Elliot, Matthildi og fleiri verkum. Gerist ekki hressara í hádeginu.

Á fimmtudagskvöld klukkan 20 verður fluttur leiklestur á verkinu Helgi Þór Rofnar eftir Tyrfing Tyrfingsson sem sýnt var Nýja sviðinu á nýliðnu leikári í leikstjórn Stefáns Jónssonar. Leikararnir Hjörtur Jóhann Jónsson, Þuríður Blær Jóhannsdóttir, Hilmar Guðjónssson, Erlen Ísabella Einarsdóttir og Bergur Þór Ingólfsson lesa.

Á laugardag klukkan 12 les leikarinn Hjörtur Jóhann stórskemmtilega ævintýrið um Hans Hugprúða.

Allar útsendingar Borgarleikhússins eru aðgengilegar hér á Vísi og á sjónvarpsstöðinni Stöð 2 Vísir.

Fleira skemmtilegt efni frá Borgarleikhúsinu má sjá á Instagram og Facebook-síðum leikhússins en þær síður eru uppfærðar nær daglega með efni tengdu starfsemi og sýningum. Einnig er hægt að finna atburði leikhússins úr samkomubanninu á öllum helstu hlaðvarpsveitum.

Borgarleikhúsið í beinni Leikhús Samkomubann á Íslandi