Kiwisun bannað að birta ósannindi um virkni ljósabekkja

Atli Ísleifsson skrifar 5. febrúar 2021 10:04

Í kynningum sólbaðsstofunnar var fullyrt að 3UV ljós í ljósabekkjum stofunnar verndi húðina gegn bruna, auki endorfín og hjálpi til við að jafna húðina. Myndin er úr safni og tengist fréttinni ekki beint. Getty

Neytendastofa hefur því bannað sólbaðsstofunni Kiwisun, sem til húsa í Borgartúni, að birta ákveðnar fullyrðingar, sem taldar eru ýmist rangar eða ósannaðar, um virkni ljósabekkja fyrirtækisins í kynningum.

Þetta kemur fram í ákvörðun Neytendastofu sem birt er í dag. Í kynningum sólbaðsstofunnar var fullyrt að 3UV ljós í ljósabekkjum stofunnar verndi húðina gegn bruna, auki endorfín og hjálpi til við að jafna húðina.

„Einnig kom fram að 3UV ljósin veiti meira D-vítamín auk þess sem græni liturinn á ljósinu geti dregið úr streitu og veiti þannig afslöppun og hugarróandi reynslu.

Í svörum Kiwisun kom fram að félagið væri ekki að fullyrða neitt sem ekki hafi áður verið rannsakað og sannað. Fullyrðingar um upplifun af græna ljósinu byggi auk þess á reynslu viðskiptavina félagsins. Svörunum fylgdu þó engin gögn til staðfestingar fullyrðingunum.

Komst Neytendastofa að þeirri niðurstöðu að ekki væri tilefni til aðgerða vegna fullyrðingar um að 3UV ljós geti leitt til aukinnar framleiðni D-vítamíns í líkamanum. Aðrar fullyrðingar félagsins taldi Neytendastofa ósannaðar og veita rangar upplýsingar um helstu einkenni þjónustunnar.

Neytendastofa hefur því bannað Kiwisun að birta fullyrðingarnar,“ segir á vef Neytendastofu.

Neytendur