„Allir að tala um að krossbandið væri slitið og ég var ótrúlega stressuð“

Hin 19 ára gamla Sveindís hafði átt draumabyrjun í atvinnumennsku með liði Kristianstad nú í apríl – greinilega tilbúin til að taka sænsku úrvalsdeildina með trompi. Aftonbladet sagði að hún yrði hreinlega fljótt of góð fyrir deildina og hún var valin besti leikmaður síðasta mánaðar í deildinni.

Á föstudagskvöld, í fyrri hálfleik í leik við Växjö á útivelli, virtist draumurinn hins vegar hafa breyst í martröð. Sveindís meiddist í hné og var borin af velli. Sif Atladóttir, liðsfélagi hennar, sat með henni inni í klefanum og hughreysti hana, á meðan að leikurinn hélt áfram, og ekkert benti til þess að aðeins væri um beinmar að ræða en ekki krossbandsslit:

„Ég fann rosalega til í hnénu við að lenda í þessu og vissi ekkert hvað hefði komið fyrir. Síðan fóru allir að tala um að krossbandið væri slitið og ég var ótrúlega stressuð. Ég var því meira stressuð en að mér væri illt,“ segir Sveindís í samtali við Vísi.

Myndband af því þegar hún meiddist má sjá hér að ofan. Sveindís meiddist á föstudag en fékk ekki að vita fyrr en á mánudag að meiðslin væru ekki næstum því eins alvarleg og útlit var fyrir. Ef krossband hefði slitnað hefði Sveindís ekki spilað meiri fótbolta á þessu ári en hún ætti að geta snúið til baka á völlinn um miðjan júní.

Læknirinn skildi ekki hvernig krossbönd héldust óslitin

„Allir sem sáu vídjóið virtust vissir um að krossbandið hefði slitnað og það sögðu líka læknar hérna í Svíþjóð þegar þeir sáu atvikið. Þetta leit því ekki vel út fyrir mig. Ég var orðin ótrúlega svekkt með að missa af undankeppni HM með landsliðinu [sem hefst í september] og Meistaradeildinni með Kristianstad – ég var bara komin þangað í huganum. Þess vegna var alveg geggjað að heyra að þetta væri ekki krossbandið,“ segir Sveindís.

Læknirinn sem kvað upp úr um að um beinmar væri að ræða furðaði sig á því að krossbandið skildi ekki hafa slitnað. Liðbönd héldust einnig heil. Það rímar reyndar kannski vel við einstaka, líkamlega burði Sveindísar að hún komi læknum á óvart:

„Þetta var greinilega mjög fær læknir sem vissi allt um krossbandaslit. Hann skildi hins vegar ekki hvernig á því gat staðið að krossbandið væri ekki farið.

Öll liðbönd eru í lagi en ég er með beinmar á hnéskelinni. Þetta fór einhvern veginn þannig að lærleggsbeinið og hnéskelin skullu saman, og þess vegna heyrði ég skell í hnénu þegar ég lenti. Það ætti að taka sex vikur að jafna sig af svona beinmari,“ segir Sveindís.

Sveindís kemur til með að missa af fimm leikjum með Kristianstad sem og landsliðsverkefni í næsta mánuði sem reyndar er ekki ljóst hvert verður. Hún ætti að geta snúið aftur til leiks um miðjan júní, eftir landsleikjahléið:

„Ég má hjóla í þessari viku og þarf bara að fara eftir því hvernig mér líður í hnénu. Ég get sömuleiðis farið að hlaupa um leið og mér líður þannig – það gæti allt eins orðið í næstu viku. Mér finnst ég líka verða betri og betri með hverjum deginum.“

Sif hjálpaði mér mjög mikið

Eins og fyrr segir átti Sveindís frábæra byrjun í sænsku úrvalsdeildinni, eftir að hafa orðið Íslandsmeistari með Breiðabliki í fyrra. Hún skoraði í fyrstu tveimur leikjunum í Svíþjóð og lagði upp eitt mark, og er Kristianstad með sjö stig eftir fyrstu þrjá leikina:

„Ég var mjög sátt með þessa fyrstu leiki fram að meiðslunum. Þetta er búið að vera mjög næs hérna í Kristianstad, umhverfið hér er geggjað og gott að hafa Íslendinga í kringum sig. Ég fíla mig mjög vel hér,“ segir Sveindís og það kom henni ekki frekar en öðrum á óvart að hún myndi spjara sig vel í sterkari deild:

„Nei, nei. Ég er líka með svo góða leikmenn í kringum mig sem að aðstoða mig mikið. Ég næ alveg að blómstra vel með þessa leikmenn í kringum mig. Þær hafa mjög mikið að segja um góða frammistöðu mína.“

Sif Atladóttir hældi Sveindísi á hvert reipi í viðtali við Vísi á dögunum og Sveindís er ekki síður hæstánægð með sinn nýja liðsfélaga, sem er að komast í gang eftir að hafa eignast sitt annað barn.

„Það er alveg geggjað að hafa Sif hérna. Þegar ég meiddist þá var hún bara með mér inni í klefa alveg þangað til að hún þurfti að fara að hita upp því hún átti að koma inn á í leiknum. Hún hjálpaði mér mjög mikið þarna. Svo er líka bara alltaf hægt að tala við hana eða kíkja til hennar í mat. Hún er svo frábær.“