Pick­ford búinn að lifa á lyginni og skutlar sér eins og hann sé ný­byrjaður að æfa

Hinn ungi Mikkel Damsgaard kom Dönum yfir með frábæru marki úr aukaspyrnu þegar hálftími var liðinn af leiknum. Markið var það fyrsta sem England fær á sig á mótinu en Pickford hafði skömmu áður bætt met goðsagnarinnar Gordon Banks yfir flestar mínútur spilaðar í landsliðstreyju Englands án þess að fá á sig mark.

Í hálfleik fór Ólafur Kristjánsson, sérfræðingur Stöðvar 2 Sport, yfir markið. Taldi hann að Pickford ætti að gera mun betur. 

„Þeir hafa brugðist frábærlega við því að hafa Pickford í markinu. Hann á að verja þetta, bara sorry. Pickford er búinn að lifa á lyginni í þessari keppni, hann hefur ekki gert nein mistök. Í þessum leik er hann búinn að vera slakast maður vallarins.“

„Hann á að verja þetta allan daginn, þetta er ekki einu sinni upp í hornið. Frábærlega sparkað og allt það en við skulum ekki blekkja sjálfa okkur, hann á að verja þetta. Ég er himinlifandi að hann sé valinn í markið hjá Englendingum, við skulum ekkert fara í felur með það,“ sagði Ólafur sem er harður stuðningsmaður Danmerkur.

Markið var svo einnig til umræðu í EM í dag að leik loknum. Helena Ólafsdóttir og Guðmundur Benediktsson voru sammála um að það væri eðlilegt að setja spurningamerki við Pickford í markinu.

„Pickford á að taka þennan bolta. Þetta er svona tvo metra frá stönginni og hann stillir sér þannig upp að hann á alveg að eiga möguleika í þetta,“ bætti Ólafur við.

„Hann kastar sér í alvöru eins og markmaður sem er búinn að æfa mark í tvo mánuði,“ 

sagði Guðmundur í kjölfarið.

Á endanum skipti Ólafur reyndar um skoðun þar sem honum fannst Danir einfaldlega útfæra spyrnuna vel.

„Við sjáum það kannski ekki í þessu en þegar Danirnir eru að stilla upp í aukaspyrnuna og Englendingar eru búnir að stilla upp veggnum þá voru þrír Danir sem stilla sér upp fyrir utan vegginn. Þeir færa sig rétt áður en spyrnan er tekin. Mér þykir leiðinlegt að segja þetta því ég vil gjarnan klína þessu á Pickford en ég vil frekar segja frábær spyrna. Á sínum allra besta degi hefði Pickford og flestir aðrir tekið þessa spyrnu.“

Ekki eru þó allir á eitt sammála um að alfarið sé hægt að kenna markverði Englendinga um en Matt Pyzdrowski, fyrrum atvinnumarkvörður sem og markmannssérfræðingur The Athletic, fór ítarlega yfir skot Damsgaard og hversu litla möguleika Pickford átti.

David Preece, fyrrum atvinnumarkvörður sem lék um skamma stund með Keflavík hér á landi, tók í sama streng.

Englendingar höfðu á endanum betur gegn Danmörku eftir framlengdan leik og eru komnir í úrslit Evrópumótsins í fyrsta sinn í sögunni. Pickford hefur aðeins fengið á sig eitt mark í mótinu til þessa og ljóst að Ítalía á ærið verkefni fyrir höndum á sunnudag er úrslitaleikur mótsins fer fram.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.