Hvessir úr suð­austri í kvöld og þykknar upp

Á vef Veðurstofunnar segir að það gangi í allhvassa eða hvassa suðaustanátt með rigningu eða slyddu undir miðnætti.

„Er líður á nóttina hreyfist lægðardragið norðaustur yfir landið með úrkomu nyrðra í formi snjókomu eða slyddu.

Jafnframt, snýst í suðvestankalda með skúrum eða slydduéljum sunnan heiða, en léttir til norðan- og austanlands upp úr hádegi. Áfram stíf suðvestanátt með skúrum eða éljum sunnan og vestan til á miðvikudag. Hiti yfirleitt á bilinu 0 til 6 stig.

Þeir sem hyggja á ferðalög í nótt og fyrramálið, er bent á að kynna sér vel færð á vegum og skyggni áður en lagt er af stað,“ segir í hugleiðingum veðurfræðings.

Veðurhorfur á landinu næstu daga

Á þriðjudag: Suðvestlæg eða breytileg átt, víða 8-15 m/s og rigning eða snjókoma með köflum, en styttir upp NA-lands seinnipartinn. Bætir í vind um kvöldið. Hiti kringum frostmark.

Á miðvikudag: Suðvestan 10-18 m/s og skúrir eða él, hvassast syðst, en bjartviðri á A-landi. Dregur úr vindi um kvöldið. Hiti nærri frostmarki.

Á fimmtudag: Hvöss sunnanátt og rigning eða skúrir, en þurrt að kalla NA-lands. Hiti 3 til 10 stig.

Á föstudag: Stíf suðvestanátt og dálitlar skúrir eða slydduél, en þurrt og bjart á A-verðu landinu. Hiti 0 til 7 stig.

Á laugardag: Suðlæg átt og dálítil væta á v-verðu landinu, en annars úrkomulítið. Fremur milt í veðri.

Á sunnudag: Útlit fyrir suðaustlæga átt með smá éljum, en úrkomulítið fyrir norðan. Svalt í veðri.